నకరికల్లులో ‘అదృశ్య’ హస్తం.. అన్నీ తానై నడిపిస్తున్న అక్రమ పర్వం!!

# మట్టి నుండి రేషన్ వరకు.. లాటరీ నుండి హౌసింగ్ వరకు.. అన్నింటిలోనూ ఆ నాయకుడికే ‘వాటా’!

# అనుచరుల ముసుగులో అక్రమ దందా.. పట్టించుకోని అధికార యంత్రాంగం!

క్యాపిటల్ వాయిస్ (పల్నాడు జిల్లా ప్రతినిధి) నకరికల్లు :-మండలంలో ఒక అదృశ్య శక్తి రాజకీయ ముసుగులో అక్రమ సామ్రాజ్యాన్ని ఏలుతోంది. బయటకు సూక్తులు చెబుతూ, తెర వెనుక మాత్రం ‘వాటా’ లేనిదే ఏ పనీ జరగని రీతిలో చక్రం తిప్పుతోంది. మట్టి తవ్వకాలు, రేషన్ బియ్యం అక్రమ రవాణా, చివరకు పేదల హౌసింగ్ స్కీమ్‌ల వరకు.. ప్రతి చోటా ఆ నాయకుడికి ‘కప్పం’ కట్టాల్సిందేనని జనం బాహాటంగానే చర్చించుకుంటున్నారు. తన పేరు ఎక్కడా బయటకు రాకుండా, అనుచరులను అడ్డుపెట్టుకుని ఈ ‘దోపిడీ’ పర్వాన్ని కొనసాగిస్తుండటం మండలంలో హాట్ టాపిక్ గా మారింది.

గత కొన్ని రోజులుగా మండలంలో సాగుతున్న అక్రమ మట్టి తవ్వకాల వెనుక అసలు సూత్రధారి ఈ నాయకుడేనన్న ఆరోపణలు వెల్లువెత్తుతున్నాయి. తన సామాజిక వర్గానికి లేదా పార్టీకి చెందిన ఒక ముఖ్య అనుచరుడికి మట్టి తవ్వకాల బాధ్యతను అప్పగించి, అధికారుల నుండి ఎటువంటి ఇబ్బందులు రాకుండా ఈయనే హామీ ఇస్తున్నట్లు సమాచారం. అందుకే పత్రికల్లో వార్తలు వచ్చినా, ప్రజలు మొరపెట్టుకున్నా అధికారులు ఉలుకూ పలుకూ లేకుండా ఉంటున్నారని విమర్శలు వినిపిస్తున్నాయి. తవ్వే ప్రతి ట్రాక్టర్ మట్టిలోనూ ఆ నాయకుడికి ‘టిప్పు’ రూపంలో భారీగా నగదు అందుతున్నట్లు తెలుస్తోంది

ఈ నాయకుడి ఆగడాలు కేవలం మట్టికే పరిమితం కాలేదు.

రేషన్ మాఫియా: పేదలకు అందాల్సిన రేషన్ బియ్యాన్ని పక్కదారి పట్టిస్తున్న గ్యాంగ్‌కు ఈయనే రక్షణ కవచంలా ఉంటున్నారు.

లాటరీ దందా: చట్టవిరుద్ధంగా సాగుతున్న లాటరీ టిక్కెట్ల విక్రయాల్లోనూ ఈ నాయకుడికి పెద్ద మొత్తంలో వాటా అందుతోంది.

హౌసింగ్ స్కీమ్స్: నిరుపేదలకు మంజూరయ్యే ఇళ్ల నిర్మాణాల్లో కూడా సిఫార్సుల పేరుతో లబ్ధిదారుల నుండి వసూళ్లకు పాల్పడుతున్నట్లు ఫిర్యాదులు వస్తున్నాయి.

మండలంలోని కొందరు అధికారులు ఈ నాయకుడికి జీతగాళ్లలా పని చేస్తున్నారనే విమర్శలు వినిపిస్తున్నాయి. అక్రమాలు జరుగుతున్నాయని తెలిసినా, సాక్ష్యాలు కళ్లముందే ఉన్నా, ఆ నాయకుడి ఫోన్ కాల్ వస్తే చాలు వెనక్కి తగ్గుతున్నారు. చట్టాన్ని అమలు చేయాల్సిన వారే అక్రమార్కులకు కొమ్ముకాస్తుంటే, సామాన్య ప్రజలు ఎవరికి చెప్పుకోవాలని ప్రశ్నిస్తున్నారు.