ప్రకృతి వ్యవసాయ పద్ధతిలో వరి సాగు పురుగుల నియంత్రణ

కాండం తొలుచు పురుగు: వరిలో కాండం తొలుచు పురుగు నివారణకు నాటేటప్పుడు ఆకుల కొనలు తుంచాలి. అలాగే ట్రైకోగ్రామా గుడ్ల పరాన్నజీవులను ఎకరానికి నాలుగు కార్డుల చొప్పున 25వ రోజు నుంచి ప్రతి 10 పది రోజులకు ఒకసారి చొప్పున 5 సార్లు వదలాలి. ఎకరానికి 8 లింగాకర్షక బుట్టలను ఏర్పాటు చేయాలి. ముందు జాగ్రత్తగా ఎకరానికి 200 లీటర్ల నీమాస్త్రం పిచికారి చేయాలి. పురుగు నివారణకు 5 లీటర్ల 5% వేప కషాయాన్ని 100 లీటర్ల నీటిలో కలిపి పిచికారీ చేయాలి. పిలక దశలో మరియు అంకురం దశలో 3 లీటర్ల అగ్నాస్త్రం 100 లీటర్ల నీటిలో కలిపి పిచికారి చేయాలి.
ఆకుముడత పురుగు: తాడుతో మొక్కలపై లాగడం వల్ల ముడుచుకున్న ఆకులు తెరచుకొని పురుగులు కింద పడిపోతాయి. ఎకరానికి ఒక లైట్ ట్రాప్ (దీపపు ఎర)ను అమర్చుకోవాలి. 5% వేప కషాయం (లేదా) నీమాస్త్రం పంట తొలిదశలో ఎకరానికి 200 లీటర్లు పిచికారీ చేయాలి.
ఉల్లికోడు: ఎకరానికి ఒక లైట్ ట్రాప్ (దీపపు ఎర)ను అమర్చుకోవాలి. అగ్నాస్త్రం 5 లీటర్లను 200 లీటర్ల నీటిలో కలిపి పిచికారి చేయాలి.

సుడిదోమ: దీని నివారణకు పొలంలో కాలిబాటలు తప్పనిసరిగా తీయాలి. పసుపు పచ్చ, తెల్లని జిగురు అట్టలు, ఎకరానికి 20-25 చొప్పున అమర్చాలి. 5 నుంచి 6 లీటర్ల తూటికాడ, కుంకుడు కాయల రసాన్ని 100 లీటర్ల నీటికి కలిపి మొక్కల పాదుల దగ్గర పిచికారీ చేయాలి. పొలాన్ని అడపాదడపా ఆరబెట్టాలి.
ఆకునల్లి: గట్ల మీద బంతి మొక్కలు నాటాలి. పంట మీద ఆవుపేడ, ఆవు మూత్రం, ఇంగువతో చేసిన 5 లీటర్ల కషాయాన్ని 100 లీటర్ల నీటికి కలిపి ఎకరానికి పిచికారీ చేయాలి.
పచ్చదోమ: పసుపు, తెల్లని జిగురు అట్టలు, ఎకరానికి 20-25 చొప్పున అమర్చుకోవాలి. ఎకరానికి ఒక లైట్ ట్రాప్ (దీపపు ఎర)ను పెట్టాలి. ఎకరానికి 5 లీటర్ల వావిలాకు కషాయాన్ని 100 లీటర్ల నీటికి కలిపి పిచికారీ చేయాలి.
తాటాకు తెగులు (హిస్పా): నాటేటప్పుడు ఆకుల కొనలు తుంచి నాటుకోవాలి. తొలి దశలో ఎకరానికి 200 లీటర్ల నీమాస్త్రం పిచికారీ చేయాలి. తరువాత దశలో ఎకరానికి 6 లీటర్ల బ్రహ్మాస్త్రం 100 లీటర్ల నీటికి కలిపి పిచికారీ చేయాలి.(సేకరణ : డా.ఎస్. లోకేష్ బాబు, శాస్త్రవేత్త (విస్తరణ విభాగం), డా.కే .కిరణ్ కుమార్ రెడ్డి (పంట ఉత్పత్తి విభాగము) కృషి విజ్ఞాన కేంద్రం, నెల్లూరు.)