ఆరోగ్యానికి ఔషధం ‘మునగ’ సాగు… తెలుసుకుందామా !!
పోషక విలువలు… !!
మునగ ఆకులు, కాయలు.. కూరగాయలుగాను, ఆరోగ్య సమస్యలకు ఔషధంగాను ఉపయోగపడతాయి. వీటిలో మనిషి ఎదుగుదలకు అవసరమైన విటమిన్-ఎ, బి, సి, లు, కాల్షియం, మెగ్నీషియం, ఇనుము, పొటాషియం వంటి ఖనిజ లవణాలు, ప్రొటీన్లు మిగతా కూరగాయల కంటే అత్యధికంగా ఉంటాయి. మునగలో నారింజ కంటే ఏడు నుండి పదిరెట్లు విటమిన్స్, క్యారెట్ కంటే పదిరెట్లు ఎక్కువ విటమిన్ ఎ, పాలకంటే 4 రెట్ల ఎక్కువ కాల్షియం, పెరుగు కంటే 9 రెట్లు ఎక్కువ ప్రోటీన్, అరటిపండ్ల కంటే 15 రెట్లు ఎక్కువ పొటాషియం ఉంటాయని ఆరోగ్య నిపుణులు చెబుతున్నారు. ఔషధ గుణాలు మునగ ఆకులను, రసాన్ని, కాయలను, చెట్టు బెరడును ఆయుర్వేదంలో అనేక ఆరోగ్య సమస్యలకు ఔషధంగా వినియోగిస్తారు. ముఖ్యంగా రక్తహీనత, ఎముకలు, కీళ్లకు సంబంధించిన వ్యాధులు, క్యాన్సర్, మలబద్దకం, కంటిచూపు వృద్ధి, గుండె జబ్బులు, కిడ్నీలో రాళ్లు, థైరాయిడ్ సమస్యలు, ఇన్ఫెక్షన్ కట్టడికి, వీర్యకణాల వృద్ధికి మునగ అద్భుతంగా పనిచేస్తుందని ఆరోగ్య నిపుణులు చెబుతున్నారు.
ఈ జాగ్రత్తలు తీసుకోవాలి… !!
మొక్కలు 4-5 అడుగులు పెరిగిన తర్వాత మొక్కల తలలను తుంచేయాలి. దీని వల్ల చెట్ల ఎత్తును అదుపు చేసి, పక్క రెమ్మలు బాగా వచ్చేటట్లు చేయవచ్చు. కాయలు కోయుటకు సులభంగా ఉంటుంది. గాలికి చెట్లు విరిగిపోవు. నాటిన 110 రోజులకు మొక్కలు పూతకు వచ్చి 170-180 రోజులకు కాయలు కోతకు సిద్ధమవుతాయి. ఆపై సుమారు 4 నెలలు కాయల దిగుబడి వస్తుంది. మొదటి సంవత్సరం కోతలు పూర్తయిన తర్వాత 7-8 అడుగుల ఎత్తులో కొమ్మలను కత్తిరించి తిరిగి కార్సీ పంటను పెంచుకోవచ్చు. ప్రతి చెట్టు నుంచి 200-225 కాయలను (50-65 కిలోలు) దిగుబడిగా పొందవచ్చు. మునగను సాధారణంగా ఆకులను తినే గొంగళి పురుగులు, కాయ ఈగ ఆశించి నష్టపరుస్తాయి. వీటి నివారణకు పాస్పోమిడాన్ (లీటరు నీటికి 2.5 మి.లీ.) మందును పిచికారీ చేస్తే సరిపోతుంది. ఖర్చులు పోను ఎకరం మునగ సాగుతో సంవత్సరానికి 75 వేల నుండి లక్ష రూపాయల వరకు నికర ఆదాయాన్ని పొందవచ్చు. మునగ ఆకులను ఎండబెట్టి వివిధ రూపాల్లో ఆకర్షనీయంగా ప్యాకింగ్ చేసి, వ్యాపార సరళిలో ఆదాయం ఆర్జిస్తున్నారు. మునగ ఔషధ గుణాలను ప్రజలు గుర్తిస్తున్నందున ప్రస్తుతం మంచి గిరాకీ ఉంది. కాబట్టి మునగ సాగు రైతులకు నేడు లాభదాయకంగానే ఉంటుంది.